'/>

venerdì 14 dicembre 2018

La Scala Bora

Ben bon, sicome semo stufi de quantificar la potenza dela bora sula noiosissima e imprecisissima scala dei chilometri orari che dopo ognidun disi quel che el vol, stemo elaborando una nuova Scala Bora, molto ma molto più utile nel descriver el fenomeno catabatico blablabla.

Pupol by Erika Ronchin
Sta Scala Bora sarà più vicina ala gente, niente numeri freddi e emotivamente stitici che nissun li caga, ma una bela definizion per ogni livello de bora che se pol usar in osteria per far colpo sule babe, o sul vin, se no xe babe, roba bastanza comune. Quindi tipo "Iera cussì tanta bora che me xe svolade le mudande del pergolo".

Xe in definizion, quindi podè contribuir nei comenti se volè. L'ispirazion xe l'ecelente lavoro dei sienziati che misura i tornado col cul dele galine.

Bon.

Scala B.O.R.A. (Bora Orcotron Remengo Actions)

0. No xe più la bora de una volta.
1. Iera cussì tanta bora che le cocalare de Trieste ghe dava de magnar ai colombi de Venezia.
2. Iera cussì tanta bora che l'ultimo gran premio del Brasile lo ga vinto un scovazon de Trieste
3. Iera cussì tanta bora che anca l'Ursus xe andado a remengo
4. Iera cussì tanta bora che anca remengo xe andado a remengo e l'Ursus no saveva più dove andar.
5. Iera cussì tanta bora che... bon, i gati no gaveva comunque pel cul.
6. Iera cussì tanta bora che semo rivai studar i incendi in Sardegna fazendo le gare de pissade del Molo San Carlo.
7. Iera cussì tanta bora che no serviva più molarghe el fil al mandriol peloso perchè iera za svolado via (e no iera gnanca più peloso ormai).
8. Iera cussì tanta bora che se te verzevi insieme le portiere del'auto te sparagnavi sul volo Trieste-Cità del Capo.
9. Iera cussì tanta bora che se te molavi una scoresa la fazeva el giro del mondo e dopo un do minuti te rivava una s'ciafa de damer intel muso da est-nordest.
10. Iera cussì tanta bora che iera impossibile bestemiar: se te provavi tirar zo un santo el svolava via prima (in compenso el te bestemiava drio lui).


Ben bon, certi de gaver fato un utile servizio ala citadinanza, ve ricordemo che xe pena uscido "THE ORIGIN OF NOSEPOLIS", aka Monon Behavior 4, nele librerie più bobe nonchè comodamente online qua!
E tuti i misteri de Trieste, dala maledizion de Miramar al Nosepol, dal Quel che se ciama ala movida, dai cocai ale Lasko ve sarà finalmente riveladi!
O se preferì un bel zogo sai figo e cocolo, el must xe BARKOLANA col'espansion MATI PER BARKOLANA! Daghe!






Nessun commento:

Posta un commento

Disi la tua, ale!