San Nicolò 2020: istruzioni per l'uso

 Alora manca poco a San Nicolò, forsi qualchidun ga za scrito la leterina e ormai xe tardi, ma per i altri speremo de esser ancora in tempo per dar dele semplici istruzioni sula gestion de San Nicolò ai tempi del covid.

0 (basilare). Ricordeve che de noi gira San Nicolò e no Babbo Natale, né Boba Natale, né Bobana Tale, né Babbo Nagana. Quindi mandeghe a lui la leterina, se no el se ofendi e el ve porta solo che carbon, che desso che la Feriera xe serada ghe toca anca far fadiga de portar carbon foresto.

1. Prima de scriver la leterina a San Nicolò sanificarse ben le zatine.

2. Una volta finida, no serar la busta licandola! Feghela licar al can o doprè un poca de cola, meo de tute la UHU che dopo podè zogarve a far le cagole con quela che xe de tropo. Tra l'altro dovessi esser sanificante anca quela, a ocio.

3. Se volè far i cocoli e lassarghe un bicer de late e un mandarin per quando che el riva, no stè far! L'unica roba che podè lassarghe xe trapa almeno al 40% de alcol che xe sicuro disinfetada.

4. Se gaverè seguido sti primi 3 punti, alora San Nicolò dovessi rivar a portarve i regali senza ciapar el covid. Se inveze ghe ciapa mal e el prossimo anno no el vien, sarà colpa vostra che lo gavè infetado.

5. Parlemo de regali, eco i regali cool del 2020:

- trombini LIDL

- fapunte LIDL

- penaiolo LIDL

- imortale panocia lanfur, quela no passerà mai de moda.

- mascherina de pinguin in pandàn cole lucete

- ociai fantachimerici per veder la stela cometa drita

- olive: anche questo anno sette quintali. Ottima annata.

- foto de tramonti: Trieste e i suoi tramonti che ti fanno innamorare.

- bilieto omagio per l'inaugurazion del'ovovia o del Parco del Mare.

6. Ma el regalo più bel xe sicuramente i tre libri dela colana de San Nicolò: La bereta de San Nicolò, San Nicolò e i Krampus e le mudande de San Nicolò. Hehe un poca de reclàm no guasta mai.

7. Gavè fato tuto ben, bravi. Ma tanto San Nicolò xe de Bari, che xe in zona arancio, per cui no el pol moverse. No, no va ben l'autocertificazion, perché quel che el fa no xe "lavor". No el xe miga furlan. Quindi per sto anno feve i regali de soli, andè in libreria e cioleve i bei libreti de San Nicolò, i vien 5 euri l'un (reclàm de novo :P).

E per restar agiornado cole monade, iscrivite ala monadesletter:

Le mudande de San Nicolò

Manca un mese giusto al 6 dicembre. Bon, podessi esser el momento giusto per scriverghe la leterina a San Nicolò, cussì el riva a organizarse el viagio perchè in tempi de Covid podessi esser pupoli povero.

E cossa domandarghe se no...

LE NOVE AVENTURE DE SAN NICOLO'!

Xe rivadi infati in libreria (e anche da Urbanwear e Tipicamente Triestino) due novi episodi dela colana de libri dedicada al Santo preferito dei triestini:

San Nicolò e i Krampus, in cui el doverà corerghe drio a sti mati che vien zo dela Carnia a far scandal e divertirse in Porto Vecio sula 81 e in giro per la cità.

Le mudande de San Nicolò, in cui el doverà corerghe drio (sempre corer povero, ghe calerà la panza!) a cinghiai e cocai che ghe vol rubar le mudande, quele bele che el gaveva vinto in osmiza e anche quele con cui el gaveva partecipado al'Olimpiade dele Clanfe!

Che insieme col numero 1, La bereta de San Nicolò, forma una trilogia imperdibile :)

Perchè ciorli tuti? Perchè varde coss'che nassi co li metè vicini in libreria:

Eh eh, ebbene sì... probabilmente ghe sarà anche un 4 e un 5, cussì el pupolo sarà completo! :)

Bon, cossa spetè? Corè in libreria a ciorli! I costa 5 euri.

Ve contemo anche un segreto. Da desso fin a Nadal le edizioni White Cocal Press farà consegne a domicilio (nel comun de Trieste, altrimenti xe de pagar anche le spese de spedizion) con oferta 3x2 su tuto el catalogo dei libri. Verzè el link, scegliè 3, mandè una mail a manna@bora.la con scrito quai volè e dove e quel che costa de meno xe in omagio (podè anche cior 6, cussì gavè ben 2 in omagio). Morale: podè gaver la serie completa dei San Nicolò comodamente a casa a 10 euri.

E per restar agiornado cole monade, iscrivite ala monadesletter: