Visualizzazione post con etichetta 2013. Mostra tutti i post
Visualizzazione post con etichetta 2013. Mostra tutti i post

sabato 25 gennaio 2014

Almonacco 2013

Le robe veramente importanti del 2013 a Trieste
Per no perderlo sul diario de facebook, lo riscrivemo qua

Genaio
Xe rivà Ponte Curto. El xe curto. No xe vero. Sì che xe vero. Se te disi che xe curto, el sindaco te denuncia. Un comitato de citadini strinzi le sponde zucandole cole corde e tuto se giusta.

Febraio
I veci xe ancora là che varda el cantier del Ponte Curto, nato disgrazià. Nel fratempo, quel'altro nato disgrazià, el tran de Opcina, no se ga ben capì se el sburta radicio o se prima o poi el tornerà a corer sule sine.

Marzo
Ponte Curto xe verto. Dopo do giorni, se iaza, i veci sbrissa e bisogna serarlo.

Aprile
La Serracchiani vinzi le elezioni. El PD va in para, riunion imediata per capir cossa nassi e cossa i gavessi dovudo far per perder.

Magio
Esci Polskarivemo!, el libro più bel del mondo!

Giugno
Un pericoloso reportage al'alba testimonia la presenza de una latina in cavana, un cestin de scovaze pien de scovaze e muleria che bevi bira in via venezian. Imediato l'alarme movida e degrado.

Luglio
El sindaco Cosolini apri l'Olimpiade dele Clanfe butandose in acqua vestì. La giuria lo picona perchè el ga fato un piron. Però no el se ga tapà el naso.

Agosto
Riva finalmente l'estate. Su segnalazioni Ciano Fasol disi che no xe mai sta' cussì caldo.
Finissi l'estate. Su segnalazioni Toio Biso disi che no xe più el caldo de una volta.

Setembre
250 fora come pergoli se iscrivi ala Rampigada Santa e se fa tuta Scala Santa in su, de corsa o in bici.

Otobre
La Fenice falissi, i libri ris'cia de finir al macero. Pupoli. I triestini li compra al 10% del prezo.
Memori del'esperienza, tuti desso gufa che falissi anche qualche azienda vinicola.

Novembre
Riva Putin a Trieste, la cità xe blindada. No se ga capì ben cossa el xe vegnù a far. Vosi disi che, dopo gaver incontrà Dudù la sera prima, el voleva incontrar anche el can de Trieste.

Dicembre
Una nova discoteca vol verzer in pien centro. Per prevenir l'overdose de movida, nassi un comitato che ingruma firme per serarla prima ancora che la verzi.
Polska... rivemo! vinzi el secondo premio al Concorso Letterario Nazionale dedicado a tuti i dialeti italiani. Premiazion in genaio al Campidoglio!

Buon 2014!