Get Beco

Torna la meravigliosa rubrica de Clinz Eastwood: Triestewood!

Eco el titolo de ogi:

GET BECO

Version slongada de GET BACK, el documentario sula fine dei Beatles, che conta come le robe xe andade veramente. Tuto parti dala rivalità storica tra i Betoles, vero nome dela band, e i Roling Sbronz. Dopo gaver provado mile monade per superarse a vicenda, finalmente i capissi che el vero mercato dela musica xe a Trieste. Cussì i parti tuti insieme, ma John e Yoko ciol casa in Bisiacaria, e i cambierà i cognomi in Lennononon e Ononon. Intanto Nosepaul McCartney fa sai pupoli con Keitheson Richards, e Mickeze Jagger aprofita per andar al Pedocin a far colpo sule vece sonando Satisprizon. I Betoles rilancia con un mega concerto sul pergolo de Palazo Cheba, sonando Lucy ga i sky sudai, All you need is l'ovo duro, Hey Jure, Let it be capo in b, Cevapcici field forever e el toco forte Yellow ovovia. Ala fine però el colpo de scena: dale scalete sul mar de Piaza Unità vien fora Lorenzo Pilat, che xe rivado là in pedalò dai Topolini, e taca sonar La cavala zelante. Tuta Trieste alora se volta e manda a remengo i Betoles e i Roling Sbronz, aclamando al'unisono l'unico vero idolo musicale dela cità.

 

E per restar agiornado cole monade, iscrivite ala monadesletter:

Meti qua la mail dei! 

A star al Bor

Torna la meravigliosa rubrica de Clinz Eastwood: Triestewood!

Eco el titolo de ogi:

A STAR AL BOR

Version domacia de A STAR IS BORN, con protagonisti Lady Baba e Presnitz Cooper. Xe la storia de un cantante famosissimo ma un poco petesson che un giorno incontra in osmiza una mulona. Tra un otavo e l'altro, ela a un certo punto la canta "la cavala zelante", e lui se inamora. Presto i se sposerà, con "Ai bai tu me la darai" come marcia nuziale. Ma la crisi par in arivo: i li assumi per cantar a un super convegno al Bor con tuti i presidenti de tuto el mondo, domandandoghe de far la canzon del famoso vento de Trieste, intendendo oviamente "La nova bora" (che poi saria el tran de Opcina). Ma i due stracapissi, e davanti a tute le persone più potenti del mondo, i taca a cantar: "La scoreseta, xe un vento tiepido, che fa soletico, ai pei de cul". I presidenti se indigna, ma sui social el video diventa virale e "La scoresa" diventa de colpo la canzon più famosa del mondo, sora anca dei Betoles e dei Moneskin.

E per restar agiornado cole monade, iscrivite ala monadesletter:

Meti qua la mail dei! 

La carabinovia

Ieri sera in Bar Bastel go sentido el solito Gianciano Sgaiovich che el ne contava le novità sula ovovia. 

 El ga dito che in pratica i ricorsi al Tar par che andarà a bon fine, e i dimostrerà che l’ovovia rovina la natura. 

Quindi i riverà a blocarla? No! Perché Dipi riverà comunque a cazarghela. 

In pratica l’avocato che el ga ‘pena ciolto el riverà a far in modo che tuta quela zona no sia più proteta, ma che la diventi un sfogatoio per darghe contro ala natura. Insoma per sfogarse de tuto quel che no se pol far più de nissuna altra parte. 

E cussì l’ovovia diventerà in realtà una carabinovia: te monti su col s'ciopo in man e PAM te ghe tiri ai useleti dala carabinovia, intanto che te rivi a Campo Romano. 

I fioi invece, che no pol doprar ancora i s'ciopi, pol tirarghe cola cerbotana sui useleti de quei che ciapa sol col gigio de fora in giardin. 

Gianciano Sgaiovich sa sempre una più de tuti!

Nela foto, l'anteprima dela carabinovia col bel sfondo del faro in tuto el suo splendor.

Full Metal Jota

Per la rubrica su come saria i film se invece de Hollywood gavessimo Triestewood...

Che poi xe quel che conta el bel libro "C'era una volta a... Triestewood", che trovè in libreria opur comodamente online qua (reclam!)

Eco el film de ogi: 

FULL METAL JOTA. 

Film capolavoro de Stanley Kulbrick, ambientado a Trieste. La prima parte xe ambientada in Porto vecio, durante l’adestramento dei novi piloti de ovovia. Un de lori, durante un discorso del sergente magiore Dipiazzaman, el disi per viz “Chi no salta xe furlan”, fazendo rabiar Dipiazzaman, che de quela volta lo ciamerà “Joter”. Dipiazzaman xe ‘sai severo e el se la ciapa anca con el più sgionfo de tuti, “Bala de porzina”, disendoghe che no el riverà mai a entrar intuna ovovia.

La vendeta de “Bala de porzina” sarà teribile: finido l’adestramento, el giorno del’inaugurazion del’ovovia, el comincerà a scassarse de qua e de là, fazendo dindolar robe de mati el suo ovo. Al primo refolo de bora, l’ovovia, tuta imberlada, vegnirà zo, tra l’entusiasmo dela citadinanza.

E per restar agiornado cole monade, iscrivite ala monadesletter:

Meti qua la mail dei! 

I propositi per Trieste 2023

Eh niente, come ogni giro, eco i 7 boni propositi per la Trieste del 2023, de leger entro el 6 genaio e de dimenticar entro el 7 genaio.:

 

1.     Indrizar la cometa portapegola.

2.    Cambiarghe giro al’ovovia fazendola passar sora la Galeria de Montebel, tuti contenti e due problemi risolti.

3.    Trasformar l’intervento de Piaza Sant’Antonio da “conservativo” a “una man de bianco”.

4.    Far partir el tram de Opcina, propio nel senso de “partir”: ciau, se no  se vedemo più auguri. Slongarghe le rotaie fin in Friul, là i dovessi rivar a ‘giustarlo e dopo farghe far qualche sfida con la Litorina de Cividale.

5.   Verzer l’Aquario con drento la piscina terapeutica e vasche con quei pesseti che te rosiga i dedi dei pie fazendote grizoli (terapia dela ridada).

6.   Ponti roti de Ponterosso: conzarghe sora el talero, dovessi tegnir.

7.   Lamentarse dei primi 6 punti.

E per restar agiornado cole monade, iscrivite ala monadesletter:

Meti qua la mail dei! 

Triestini e Barcolana: Master & Comare

Gnente, festegemo la setimana dela Barcolana con questo film importantissimo:

MASTER & COMARE: SFIDA AI CONFINI DE SAN BARTOLOMEO

Meme de Triestewood

Dopo el grande sucesso de “Master and commander - sfida ai confini del mare”, i due grandi atori Russel Crodiga e Nosepaul Bettany torna con sto sequel ambientado a Trieste durante la Barcolana, dal sototitolo “Sfida al confin de San Bartolomeo”. I due capitani xe in corsa per vinzer la regata più famosa del mondo, ma sul più bel che i gavessi de girar la boa a Muja, i se inacorzi che inveze nissun ga fato la manovra giusta. Alora i va a controlar cossa nassi e i se inacorzi che ai timoni ghe xe do babe che sta ciacolando tra de lore, senza vardar el campo de regata. “Siora Jole, ma perché un giorno no andemo insieme a magnar in Jugo, che xe ‘sai bon e costa poco?”. “La ga ragion Ondina, ma la sa cossa? Andemo ‘desso!”

El film finissi con Russel Crodiga e Nosepaul Bettany che se sfida a chi magna più cevapcici. Vinzi Russel Crodiga, e se vedi.

Eh bon. E per chi vol divertirse anca a tera, ricordeve de cior el zogo Barkolana!

Toto-tram

Go scoperto che in Bar Bastel ghe xe un giro de scomesse ilegali sul tram de Opcina.

Ste qua xe le quotazioni del tototram:

-         Ripartenza pe’l compleano del sindaco 2023: 100 a 1

-         Sostituzion dei binari con quei del brucomela che par più driti: 5 a 1

-         Pensionamento de tuti i frenadori prima che el riparti: 2 a 1

-         S’cioca con l’ovovia: 1 a 1

-         Novo sistema de traino a bici eletriche al posto dei cari scudo blu: 3 a 1

-         Sparizion misteriosa de tute le veture (che dopo se scoprirà esser sconte in galeria Montebel): 2 a 1

-         Trasformazion del tram in barachin per petessoni al’Obelisco: 1,1 a 1

-         Trasformazion dei semafori dela linea in lucete nove per Piaza Unità a Nadal: 2 a 1

Comunque anche in Bar Bastel tuti ghe vol ben e el 9 setembre i festegia i 120 ani del tram. Putropo per sto giro no podemo augurarghe altri “100 de questi giorni”, perché portassi un poca de sfiga. 

Ricordeve che xe vegnudo fora Tachite al tram, el zogo! Lo trovè nele librerie e negozi più boba, e anche qua!

E per restar agiornado cole monade, iscrivite ala monadesletter:

Meti qua la mail dei!