giovedì 20 febbraio 2014

El dazio del far el mona per no pagar el dazio

Ogi l'oroscopo dei pessi de Internazionale (mio, essendo nato el 4 marzo) disi:
"Dal 2010 al 2012 Eric Garcetti ha lavorato nelle serie televisive The closer e Major crimes, dove interpretava il ruolo del sindaco di Los Angeles. Poi, nel 2013, si è presentato alle elezioni ed è diventato veramente sindaco della città. È uno spettacolare esempio dell’idea di Kurt Vonnegut secondo cui tendiamo a diventare quello che fingiamo di essere. [...]"

Questo me ga fato molto pensar ala veridicità de un modo de dir triestin: far el mona per no pagar el dazio.

Fazendo finta de esser mona, in pratica, no te paghi el dazio. Però secondo Kurt Quel te diventerà mona per bon. E a quel punto no te farà più el mona, perchè te sarà mona, e i mone no riva a far i mone. Quindi ala fine el dazio te tocherà pagarlo. Ciapa.
El modo de dir quindi xe falso. Se te fa el mona, ala fine te pagherà el dazio. E in più te diventerà anche mona per bon.


E dopo me xe vegnudo in mente che ghe xe anche el caso de quei che fa i finti boni. Sempre secondo Kurt Quel, un ala fine a far el finto bon diventerà bon per bon. Bon per bon xe Bon al quadrato. Te ghe zonti el bon che te fazevi finta de esser, e diventa Tre volte bon, che vol dir mona.
Morale: anche a far el finto bon te diventerà mona.

Quindi inutile far finta de esser quel che no se xe dei. Basta con ste false aspirazioni. Imparemo ad acetarse per quel che semo e seguimo el futuro che xe za stado scrito:



P.S. anche el bonbon, se xe bon, xe un bon bonbon, quindi xe tre volte bon, quindi xe mona.




3 commenti:

  1. ...infati per mi per eser veramente boni bisogna eser giusti e far pagar el dazio a quei che fa i mone per no pagarlo. Se el motivo per no far i mone xe che comunque poi el dazio i lo pagherà, alora farghelo pagar subito ghe farà pasar la voia de far i mone e cussì de diventar mone. Salvi grazie ai giusti :)
    Comunque xe vero, se te pensi de eser qualchidun e te agissi come quel qualchidun, prima o poi te diventi quel qualchidun; se te pensi che un altro sia qualchidun e te se comporti con lui come se fussi quel qualchidun, per ti l'altro diventerà quel qualchidun. Potere deMente.

    RispondiElimina
    Risposte
    1. cmq dio no xe furlan, e se no paga ogi paga doman.
      da questo se deduci che i furlani no paga (el dazio).
      quindi i furlani fa i mone, beccati.

      Elimina

Disi la tua, ale!