Coronavirus, i dieci comenti boni per ogni ocasion

Coronavirus:
gnente, sicome gira sai disinformazion e tuti invece ga sai voia de esser informai per via che altrimenti dopo no i gavessi più argomenti per ciacolar coi altri in betola (ricordeve de bever sempre un fià de brinjevec sia co rivè che co andè via), dopo gaver fato un otimo servizio ala coletività coi 10 consigli sul coronavirus, ogi ve demo sti diese punti cardine da usar in un qualsiasi giorno in una qualsiasi discussion in che qualsiasi ordine che volè:

1. Stamatina iera un caso in più a Udine rispeto a Trieste. Sempre avanti i vol esser i furlani.
2. Due casi novi a Gorizia anche ogi. Finalmente i ga qualche novità de contar anca a Gorizia dei.
3. Dei casi a Pordenon nissun sa gnente. Solito, no se capissi se considerarli Veneto o Friuli Venezia Giulia.
4. Ciò mi digo che co i ga fato l'incontro con tuti i sindaci dela regione sicuro a qualchidun ghe ga ciapado qualcossa, mal che vadi el squaraus.
5. Sto dopopranzo un altro caso novo in Region, go pena leto su Trieste Cafè. Anzi speta che agiorno... ecolo, altro articolo, semo a più uno e mezo. Se agiorno de novo xe un altro articolo che riva a più due.
6. El Covid19 no passa per i animali, quel xe el Codind 19.
7. Le scole xe serade e i veci podessi finalmente andar in coriera senza gaver tra le bale i fioi col zaino che intriga. Ma i ga paura del virus e i sta perdendo l'ocasion dela vita. Co tornerà la normalità e le coriere sarà de novo piene de zaineti, i se lamenterà disendo che "Ghe volessi un poco de coronavirus".

8. Go sentido che el virus no se lo pol passar cole scorese. Alora stago metendo su un mercato nero de mascherine fate cole mie mudande usade.
9. I ga dado bora forte i prossimi giorni mi fazessi che se bechemo tuti sule rive e tiremo un stranudon verso Venezia e te vedi che ghe la petemo tuta a lori e qua semo a posto.
10. Intanto che voi ciacolè monade su Trieste Cafè xe za vegnudo fora el toco che semo a più due virgola tre contagiadi.
11. Mi credo che un libro sai bel sia "Le disgrazie del tran de Opcina". (Sì bon no centra un clinz, ma lassene far un poca de reclàm. Podè ciorlo qua. :D )

E per restar agiornado cole monade, iscrivite ala monadesletter: