El ristorante McSimilian's a Miramare

Va ben, visto che xe de atualità el ristorante nel Castel de Miramar, ne par giusto publicar sto toco de "Le disgrazie del tran de Opcina" in cui se parla propio de come che sarà le robe nel 2052, con el castel trasformado nel meraviglioso ristorante McSimilian's.
Per dar i giusti crediti (o le giuste responsabilità), l'idea del nome McSimilian's e el pupolo qua soto xe de Paolo Rovis, che ga ispirado el resto.

CAPITOLO 15. EL RISTORANTE McSIMILIAN'S

El McSimilian’s xe probabilmente el ristorante più famoso (e caro) de tuta la cadena furlana dei McFrico’s. Conossudo in tuto el globo, secondo la famosa guida Monely Planet xe una dele sete meraviglie del mondo moderno, insieme a:

- El stadio de s’cinche in salita de Rio de Cianeiro, l’unico a esser in salita contemporaneamente in tute le direzioni, grazie ala particolare rotazion centripetobalistica del sistema stantufedelico integrado;

- La cità russa de Mussato, sorta dopo la distruzion de Mosca nel 2037;

- Le tori gemele eterozigote de New Yorkamare, una longa e strenta e una picia e tracagnota;

- I giardini pensili de Babirogna, che no xe perchè te ga de pensarli ti;

- La statua de Madre Teresa d’Austria, con cui el scultor istroamerican Jim Sparagno ga dimezado i costi del progeto originale che prevedeva inveze due statue, una per Madre Teresa e una per Maria Teresa d’Austria;

- El termovalorizator Sbrovax 3000plus de Cicago, un’enorme costruzion a forma de condoto indove che tuto el mondo pol butar le propie scovaze scarigandole diretamente coi aerei C-130 ErCules.

Costruido drento del Castel de Miramar, el ristorante McSimilian’s ne mantien inalterada la memoria, alternando le portate gastronomiche a vere e propie visite guidade ai locai storici. La specialità nel menù xe oviamente el pesse, che i camerieri va a pescar fresco ogni matina intela riserva marina. La qualità xe quindi adiritura certificada del WWF (World Wildlife Food) e magnar qua xe un’esperienza indimenticabile. Solo una volta i ga gavudo rogne, per via che un cliente ghe xe morto el giorno drio pel mal de stomigo. Ma i potenti avocati del McSimilian’s ga gavudo vita facile a dimostrar che semplicemente el mato gaveva magnado cussì ben che el se gaveva rilassado tropo, e ala fine el gaveva deciso de farse una stricadina sul canapè de Carlotta, andando incontro ala famosa maledizion del Castel, che de secoli copa tuti quei che incautamente spava là.

Sentadi a un tavolo vicin de una finestra verta sul mar, i maestri, el Podestà e Chanel Nacici sta per ordinar, butando un cuc ogni tanto in direzion dela sfinge, per controlar che i muleti no sia nel fratempo rivai.

“Buonciorno signori, cosa portare a foi di buono da manciare?” ghe domanda el camerier, che per ricrear l’ambientazion asburgica parla con acento tedesco.

“Per me un McRibòn e un McTrevoltebon”, va sul sicuro el Podestà Teimbiavo.

“Kuesta essere ottima scelta. Possiamo acciuncere ottimo contorno di Ribaltafapori McNuggets”, rispondi el camerier.

“Io prenderei McAngusigolo Zum Teufel con cheesezievoli”, ordina el maestro Mandi.

“Anke kuesto ottimo manciare, sua essere scelta di crante intentitore”, disi el camerier.

[...] (e bon, miga podemo meter tuto el capitolo :D )

Trovè Le disgrazie del tran de Opcina in libreria, opur comodamente online a sto link (col sconto del 20% per tuto marzo).

E per restar agiornado cole monade, iscrivite ala monadesletter: