Continua la rubrica dedicada a come saria i film se invece de Hollywood gavessimo Triestewood.
Che poi xe quel che conta el bel libro "C'era una volta a... Triestewood", che trovè in libreria opur comodamente online qua.
Eco el film de ogi:
SPRIZ GAME
Una clapa de lori de diversa estrazion sociale, ma con do carateristiche compagne: esser cisti e bever come ludri. Sburtai dala disperazion e dala sede, i aceta de impegnarse in una serie de prove sempre più dificili, che prevedi però sempre un consumo fora scala de alcolici. Chi che finissi in coma etilico vien eliminado e ga de pagar el conto. Giorno dopo giorno, prova dopo prova, riva a sopraviver solo le meo bobe, che sa superar i postumi dela bala a oci serai e che resta in gara per el premio finale: un intiero bar tuto per lori.
‘Sai roba le scene de bevude a colo, ‘sai cruda (e quindi no per fioi) la scena in cui i muloni se buta sul’unico piatin de patatine butado là in mezo dai organizadori del zogo. Meo impizar i sototitoli: el bever come pirie porta i atori a inverigolar le parole, squasi come se i parlassi in corean.
E per restar agiornado cole monade, iscrivite ala monadesletter:
Nessun commento:
Posta un commento
Disi la tua, ale!