Riparti el calcio a 7 - la convocazion

Eh bon, sta per ripartir el mitico calcio a 7 amatoriale triestin, e ne par el momento giusto per sta anteprima del libro "Mati drio el balon" de Giuseppe Vergara con pupoli de Chiara Gelmini.

La classica telefonada organizativa per zercar de esser in 7...

Conversazione telefonica 

Caio - baloner

Sandro - baloner

Caio: Pronti?

Sandro: Pronto? Caio, son mi.

Caio: Sandrin, grande!!! Come xe?

Sandro: Solito... scolta zoghemo el giorno oto ale nove.

Caio: L’oto ale nove... mmmm...

Sandro: Te pol?

Caio: Sì, sì... posso. E dove?

Sandro: Borgo bassa.

Caio: Contro?

Sandro: Bar Gino.

Caio: I xe boni?

Sandro: I ga sei punti meno de noi ma due partide in meno.

Caio: Bon meno mal che i xe più cisti de noi, dei. No go ‘sai voia de ciapar un sopa come l’altra volta.

Sandro: Sì ma varda che i devi recuperar coi ultimi e i penultimi, per cui se pol dir che i ga i stessi punti nostri perchè i vinzerà sicuro. Poi i ga perso un due partide perchè ghe mancava gente.

Caio: E chi xe che gioga con lori?

Sandro: Alora, davanti i ga Lorenzi.

Caio: Urca mare! Chi, Massimo?

Sandro: No, su fradel, Franco. ‘Ncora più bon de Massimo.

Caio: Su fradel? Ma no el zoga in prima categoria?

Sandro: El zogava se vedi, se ‘desso el xe qua vol dir che no’l zoga più.

Caio: Vaca mare! Quel el fa camera e cusina de noi.

Sandro: Bon dei, ghe piazemo Ciccio tacà come un francobolo tuta la partida. Ghe disemo de no molarlo mai gnanca co’l va a pissar e te vederà che la gaverà dura anche lui.

Caio: Ciccio? Ma cossa te son mona???

Sandro: Perchè?

Caio: Ma ara che el mato se lo magna a merenda. Lo go visto zogar.

Sandro: Ciccio xe ultimo omo per cui el se marca la loro punta, no xe che podemo inventarse ‘sai robe diverse.

Caio: Bon scolta, penseremo co saremo là. Xe altri fenomeni? Spero de no perchè za questo basta e vanza.

Sandro: In porta i ga un mato turco.

Caio: Ma chi? Quel picio e grosso che gavemo zogà contro st’estate?

Sandro: Esato.

Caio: Porca mare!!! Quel minimo zogava nel Galatasaray co iera zovine. Ma perchè un maritimo turco zoga col Bar Gino?

Sandro: No el xe maritimo, mona, el lavora de Bar Gino.

Caio: El turco? El portier?

Sandro: Sììì, dei!!! Lo go visto mi, iero a bever un cafè, l’altra matina.

Caio: Un cafè in bar Gino? E coss’te fazevi? Spionagio pre-partida?

Sandro: Ma no, mona. Passavo de là per caso. Fa conto, che co dovevo pagar, el turco ghe ga chiesto a Gino quanto vien un cafè normale. Se vedi che fin a quel momento gaveva fato solo cafè coreti.

Caio: Te credo! Bon giro de fenomeni in quel bar. Scolta, e chi zoga ancora con lori?

Sandro: L’unico ancora che so xe Rioda.

Caio: Rioda? Quel che zogava col San Luigi?

Sandro: No, che sapio mi el zogava col Ponziana.

Caio: Mmm... ma in campo a sete con chi el zogava?

Sandro: Con Feramenta Rizzi e con Pizeria El Covo me par.

Caio: Ma el xe de Servola?

Sandro: Nooo!!! Sangiacomin come mi. Lo vedo co vado a far la spesa in coop.

Caio: Ma el xe amico de Zana e Roby Timbro?

Sandro: Boh? Mai visto con lori.

Caio: Bon me arendo, dei. No go alba de chi che sia. El xe bon, o no?

Sandro: Dovemo sperar che prima de zogar el passi in bar Gino a beverse un diese spritz perchè se el xe sincero xe forte anche lui.

Caio: ‘Soma se zogavimo col Real Madrid iera meio, dei.

Sandro: No stà esagerar, insempià.

Caio: Ma parlemo de noi, piutosto. Chi semo? Mi, ti, Ciccio e... Roby el vien?

Sandro: No’l pol, el lavora.

Caio: Ma cossa el se ga messo de novo a far turni de note?

Sandro: Se vedi che el xe curto de pila.

Caio: Mario Ladro vien?

Sandro: No. Domenica el se ga stirado zogando a basket con su fio.

Caio: E vaca mare, ma semo almeno in sete?

Sandro: Tranquilo, forsi rivemo esser anche in oto, cussì rivemo far anche un cambio. Vien anche Biofa.

Caio: Biofa??? Ma se l’ultima volta che el ga zogà balon iera Obama presidente. El sarà in forma smagliante propio...

Sandro: Eh bon dei, un in più ne fa solo che comodo.

Caio: Ma sì te ga ragion. Te lasso che go de andar. Se vedemo in campo. Stame ben, ‘dio Sandrin!

Sandro: ‘Dio Caio e no sta far tardi come al solito. Me racomando.

Riverà Caio a no perderse la partida?

Questo e altri misteri del meraviglioso mondo del balon a 7 triestin su "Mati drio el balon", in tute le librerie e negozi più boba de Trieste e dintorni nonché online nela botega dei libri triestini.

 

E per restar agiornado cole monade, iscrivite ala monadesletter: