Visualizzazione post con etichetta storia. Mostra tutti i post
Visualizzazione post con etichetta storia. Mostra tutti i post

domenica 31 agosto 2014

Veci a Trieste: l'elisir di lunga vita

Vecia in via genova, età stimata 82.

- Mia fia ga messo l'auto in seconda fila che no posso caminar tanto. Alora ghe gavemo domandà ai vigili se i ne dà la multa o no.
- E cossa i ghe ga dito?
- I ga dito che dipendi del vigile che trovemo.
- Ah beh sì, su ste robe se pol anche serar un ocio in fondo...
- Eh no, no va miga ben. O xe una lege, o no la xe.
- Eh ma la sa, qualche lege xe fata cussì, xe elastica...
- Sì ma no va ben. Mi son nata soto l'Austria, se vedi subito che son de un'altra scola.
- Come soto l'Austria?
- 1917 po', Austria ierimo!
- La xe del 1917? Orca, complimenti ciò.
- Grazie cocolo. Cossa te vol, magnavimo genuino, no come quel che vedo magnar desso i fioi...
- Eh, imagino...
- Solo che robe de casa po', che te savevi de dove che le vegniva...
- Ma de dove la xe esatamente?
- Roian son nata! Son nata che gavevo 1 chilo e un quarto. E son vegnuda su senza incubatrici, senza monade. Late de mia mama po', figurite che tetone che la gaveva.
- Posso provar a imaginar, sì, tettone (con due t, fa più massa).
- E cussì son vegnuda comunque su ben. E gnente, cussì el primo anno de vita in pratica go dormì.
- Come dormì?
- E coss'te vol che fazi una creatura de 1 chilo e un quarto? Dormi po'.
- Me par giusto.
- E dopo i me dava i ovi de casa, ogni giorno, diretamente dele galine.
- Ah sì anche mia nona me sbateva un oveto ogni matina me ricordo...
- Sì, sì, quei bei ovi de casa. E mi no xe che magnavo un solo. Un ciolevo, magnavo, dopo fazevo finta che se gavessi roto e ghe domandavo un altro. Cussì tre ovi magnavo. E no go mai gavù colesterolo o trigliceridi sa! Dio, go qualche altra magagna, ma coss'te vol, a 97 anni va ben cussì!
- Sì, sì, metessi la firma.
- E insoma sti oveti ne li portava ogni giorno una siora de Basoviza, ovi boni, de casa, del Carso.
- Boni boni quei. Bon dei se trova ancora in osmiza i ovi boni de casa del Carso.
- Ah sì eco bravo, osmiza. Bon cocolo, adesso andarò.
- Arivederla, grazie dela compagnia!
- Ciau bel, alora se vedemo fra un zinque anni dei.

E la vardo andar via.
E penso che la ga 97 anni e la xe lucidissima, e chissà quante che ghe ne ga passade.
E alora ripenso a cossa go imparà ogi, a quale in pratica xe l'elisir de lunga vita triestina che me ga sugerì la siora.
Rielaboro el dialogo, filtro le parole chiave, salvo quel che servi.
Eco. La riceta de lunga vita xe:

Tettone (rigorosamente quele con due t), dormir e osmiza.

No se finissi mai de imparar.

(P.s. Va ben, va ben, a onor del vero no la ga dito "tettone". Disemo che iera sotinteso. O forsi go imaginà mi. Tuto el resto xe vero però, anche e sopratuto el "se vedemo tra un zinque anni". Super veceta.)


giovedì 2 gennaio 2014

Tuto xe nato qua...

Bon ciò, me par giusto che el primo post sia sula storia del Monon Behavior.
Tuto xe nato dei primi due studi sciementifici (che riposteremo anca qua), quel sula strada più veloce per andar in bici de Miramare a Opcine e quel sula clanfa triestina.
Bon, scriti per farse un do ridade tra de noi, i ga fato el giro via mail de tuta Trieste.
E da là xe nata l'idea de scriverne altri e far tipo una rivista scientifica, fata scientificamente ben, ma che parli de monade, perchè de solito i paper scientifici xe dei cugni epocali, dei :P
Le prime case editrici a cui ghe gavemo mandà do tochi in crose butai zo ala viva l'A e po' bon però ne ga dito tute: volentieri. I furlani invece xe stai più lungimiranti, e xe rivai a veder el potenziale che ghe stava drio al sbrisume.
E cussì xe nato el primo Monon Behavior, che xe sta' anche el primo libro de Bianca&Volta Edizioni, a cui oviamente ghe volemo tanto ben, visto che semo nati insieme. Gemei insoma, triestini e furlani.
Ebbene sì, al'origine del tuto ghe xe stada un'ibridazion coi lanfur. Aralaralà che robe!
In poco tempo le prime 200 copie xe finide. Poi xe finide le 500 dela ristampa. Poi le 1000 dela seconda ristampa... insoma ormai semo oltre le 5000 copie vendude, che vanzada!
E bon, diria che pol bastar per ogi. Ala prossima puntata altri anedoti. Tipo come xe andada la storia dela distribuzion nele librerie più bobe de Trieste...
La pagina facebook del Monon Behavior la trovè qua.
Qua el sito uficial.
E qua la newsleter per restar agiornai.
Ciò quanti link dei! Basta :D
Ciau!